Biografia: Odon Elorza, 20 urte Donostiako alkate gisa

Odon Elorza Gonzalezek (Donostia, 1955) Gipuzkoako hiriburuko alkate izateari utziko dio 20 urte karguan eman eta gero.

Elorza Donostiako Udaleko zinegotzi 1979ko udal-hauteskundeetan aukeratu zuten aurrenekoz. Era berean, 1984tik 1991era legebiltzarkide izan zen, Etxebizitza, Azpiegitura eta Komunikabide gaietan trebatuz. Baina Legebiltzarra uztea erabaki zuen Udaleko zereginetan erabat murgiltzeko.

Ekainaren 20an Donostiako lehen alkate sozialista bihurtu zen, eta bertan bost legealdi eman ditu. Agintaldi ezberdinetan EAJrekin, Ezker Batuarekin eta Aralarrekin sinatu ditu akordioak gobernatu ahal izateko.

Hiriaren modernazioan sakondu du bere agintaldian Elorzak. Rafael Moneok diseinatutako Kursaal Jauregia, San Telmo Museoa handitzeko lanak, Victoria Eugenia Antzokiaren erreforma eta Tabakaleraren birgaitzea martxan jarri ditu Elorzak.

Orain Donostialdeako Metroa, Atotxako autobus geltokia eta 2016ko Europako Kultura hiriburua bezalako egitasmoak hurrengo alkatearen eskuetan utziko ditu.

Elorza 1975ean sartu zen Alderdi Sozialistan, baina ez zuen kargurik hartu alderdian. Hala ere, euskal nazionalismotik gertu egon da beti eta ezker abertzalearen ilegalizazioa eta Batasunako buruzagien atxiloketa bezalako gaietan ez zuen PSEren lerro ofiziala jarraitzen.

Iñaki Azkuna Bilboko alkatearekin eta Jose Luis Bilbao diputatu nagusiarekin eztabaida latzak izan ditu Elorzak. San Mames Barriaren finantziazio publikoa kritikatu zuen agintari sozialistak, San Telmo, Kursaal edo Anoeta bezalako egitasmoekin gauza bera gertatu ez zelako.

Odon Elorza Espainiako Probintzien eta Udalerrien Federazioaren (FEMP) Giza Eskubide eta Parte-hartze Batzordeko presidentea da.