EITB TALDEA
Saria
EITBPodkast plataformako "Lokatza" podcastak Ondas Saria jaso du
EITB Media
Maite Goñi EITBko Audio eta Digitaleko zuzendariak eta Amagoia Gurrutxaga podcastaren sortzaileetako batek jaso dute golardoa. Ainara Lasak, Amagoia Gurrutxagak, Idurre Eskisabelek eta Lorea Agirrek sortu dute "Lokatza".
Bideoak (1)
Informazio gehiago (2)
EITBPodkast plataformako "Lokatza" podcastak Ondas Saria jaso du astearte honetan, maiatzak 24, Malagako Soho CaixaBank antzokian egin den sari banaketa ekitaldian. Ondas Podcast lehiaketaren lehen edizioan, hizkuntza koofizialetan podcast onenaren golardoa lortu du, eta Maite Goñi EITBko Audio eta Digitaleko zuzendariak eta Amagoia Gurrutxaga podcastaren sortzaileetako batek jaso dute.
Ainara Lasak, Amagoia Gurrutxagak, Idurre Eskisabelek eta Lorea Agirrek sortu dute "Lokatza" podcasta. PRISA Audiok eta Cadena SERek antolatzen dituzte sariak, Spotifyren laguntzarekin, eta 600 gonbidatu baino gehiago bildu dituzte ekitaldian, tartean kultura, kazetaritza eta entretenimenduko pertsona entzutetsuak.
Egungo mundua feminismoaren begiradatik aztertu eta ulertzeko saiakera da "Lokatza", "mundua lokatzetan jartzekoa". Ainara Lasak, Amagoia Gurrutxagak, Idurre Eskisabelek eta Lorea Agirrek sortu dute. Ahotsa, sormena, boterea, desioa, epika, etxea, bidaia eta gatazka dira zortzi ataletan jorratutako gaiak. Ikuspegi feministatik egindako elkarrizketak, musika eta hausnarketak. Besteak beste, Arantxa Urretabizkaia, Begoña del Teso, Uxue Iturrate "Ningra", Ainize Madariaga eta Arantzazu Loidi elkarrizketatu dituzte. Denboraz kanpoko edukiak denak, estalkirik eta distortsiorik gabe sakontzeko. Musika aukeraketa Maider eta Leire trikitilariena da, eta sintonia, berriz, Mursegok sinatu du, Lourdes Iriondoren "Hala ere" abestiaren moldaketarekin. Soinu edizioa Joxe Alkainena da.
¿ Premio #OndasdelPodcast en la categoría de lengua cooficial
— Premios Ondas (@Premios_Ondas) February 23, 2022
¿Lokatza - En español ‘Barro’, el podcast de @eitbeus sobre pensamiento feminista está narrado por @ainariss, @idurreski, @AmagoiaGu y @katuajea. pic.twitter.com/3DG8GSz1Du
Ondas Podcast lehiaketaren lehen edizioa
Ondas Podcast lehiaketaren lehen edizioak "Lokatza" podcastarentzat izan da hizkuntza koofizialaren kategorian. Adituen aburuz, "podcastak EITBren apustu sendoa eta irmoa erakusten du emakumeek beren hedabideetan narratiba libreak erabil ditzaten. Podcasta erabiliz perspektiba ikuspegia duten gaiak jorratzea ahalbidetzen dela erakusten da. Baliabide berriak erabiliz, halaber, hizkuntza aberasten da".
Gaztelaniazko podcast industriari eta bertako profesionalei ikusgarritasuna ematea dute sariok helburu. 15 herrialdetako 888 hautagaitza aurkeztu dira, eta 19 izan dira lan sarituak. PRISA Audiok eta Cadena SERek antolatzen dituzte sariak, Spotifyren laguntzarekin, eta urtero Cadena SER irrati kateko Ràdio Barcelonaren bidez PRISAk banatzen dituen Ondas sarien arrastoari jarraitzen diote saio hauek.
EITBPodkast
Gero eta eskaintza zabalgoa du audio edukiak biltzen dituen EITBren plataformak. Gaika banatuta daude bertan edukiak, bost arlotan antolatuta: jakintza, bizitza, musika, kirola eta aisia-fikzioa. Gainera, EITBPodkast plataformak euskarazko audio-liburuak eskaintzen ditu, eta soinu-fikzio arrakastatsuak ere baditu. EITBPodkasten eskaintza osoa plataformaren webgunean aurkitu daiteke. Horrez gain, telefono mugikorrean zuzenean entzun daiteke edo/eta audioak bertara jaitsi, eta edukietara harpidetzeko aukera ere badago. EITB Nahieran app-aren bidez ere aurkitu ahal da lotura atarira sartzeko.
