Faktoria
Cristina Uriarte
‘Ordezkapenen aplikazioko arazoak puntualak dira eta konpontzen ari gara’
Hezkuntza sailburuak dio Ordezkagune aplikazioak gardentasun handiagoa bermatzen duela eta arazoak egun gutxitan konpontzea espero du. Hezkuntza lege berria datorren urte hasieran aurkeztea espero du.
-
Cristina Uriarte
19:48 min
Cristina Uriarte Eusko Jaurlaritzako Hezkuntza sailburuak 'Faktoria'n adierazi du ikasturte hasieran irakaskuntzan 7.000 adjudikazio baino gehiago eta 1.200 ordezkapen arazorik gabe egin direla Ordezkagune aplikazio berria jarraituz. Puntualki arazoak daudela aitortu du, baina egun gutxitan konponduko direla espero du, eta konpondu bezain laster, dauden hutsuneetarako kontratazioak egingo direla esan du.
Uriarte sailburuak iragarri du, bestalde, Hezkuntza lege berria datorren urte hasieran eramango duela Jaurlaritzaren gobernu bilerara. Hezkuntza eragileen adostasun zabalarekin landu da oinarrizko dokumentua, horretan egungo errealitatea aztertu eta nolako hezkuntza sistema nahi den bost arlotan zehazten da.
Sare publikoak lege berrian itunpekoa maila berean kokatu izana leporatu diotenei erantzun die, legeak sistema osoari eman behar diola erantzuna, ez soilik sistema publikoari.
Matrikulazioan izandako beherakadari dagokionez, Uriartek argitu du urriaren erdi aldera jakingo direla zeintzuk diren itxiko diren gelak. Jaiotze-tasak behera egin arren, ordea, Uriarteren esanetan Euskadira etortzen diren familia gero eta gehiago daude hezkuntza sisteman eta egoera horrek sortzen dituen behar berriei erantzun behar zaie.
Gizarte ekimeneko itunpeko ikastetxeetako gatazkaren inguruan, Jaurlaritza aldeekin harremanetan dagoen arren eta konponbidea erraz dezaketen neurriak proposatu dituen arren, sailburuak uste du aldeei dagokiela akordioa iristea.
