Ekonomia -
Ustezko irregulartasunak
Brasil irregulartasunak ikertzen ari da CAFekin dituen kontratuetan
Brasilgo agintariek ikerketa abiatu dute trenak eta metroak egiteko kontratuetan irregulartasunik izan den argitzeko. 18 enpresa ikertuko dituzte, CAF gipuzkoarra tartean.
Erredakzioa
Brasilgo Defentsa Ekonomikoaren Batzorde Administratiboak ostegun honetan jakitera eman duenez, prozesu administratiboa irekiko du 18 enpresaren erantzukizuna zehazteko, trenak eta metroak ekoizteko kontratuetan ustez izan diren irregulartasunen inguruan. CAF gipuzkoarra tartean dago.
Agintariek ikertuko dituzten enpresen artean, Alstom (Frantzia), Bombardier (Kanada), Caterpillar (AEB), Mitsui (Japonia), DaimlerChrysler (Alemania) eta Hyundai-Rotem (Hego Korea) daude.
Batzorde horren arabera, guztira 9.400 milioi errealeko balioa duten proiektuetan atzeman omen dituzte irregulartasunak.
Prozesu administratiboa irekitzea ekarri duten ikerketen arabera, enpresa horiek eta Brasilgo beste konpainia batzuek eskaintza batzuk adostu zituzten hainbat proiektu esleitzeko prozesuetan, onura guztiek izateko.
