Ekonomia -
Europako Batzordea
Armintzan plataforma eoliko bat eraikitzeko 33 milioi bideratu dituzte
Bizkaiko golkoan, itsaso zabalean, plataforma eoliko bat egiteko 33,4 milioi eman ditu Europako Batzordeak. Bost megawatteko bi aerosorgailu izango ditu, eta bi megawatteko beste bi.
Erredakzioa
Bizkaiko golkoko itsaso zabalean, Armintzan (Bizkaia), plataforma eoliko bat eraikitzeko 33,4 milioi euro bideratu ditu gaur Europako Batzordeak. Plataformak bost megawatteko bi aerosorgailu izango ditu, eta bi megawatteko beste bi.
Guztira, Batzordeak 96,6 milioi euro emango ditu Euskadin, Andaluzian eta Kanariar Uharteetan hiru proiektu gauzatzeko. Diru-laguntzak NER300 energia berriztagarrien ekimen berritzaileak finantzatzeko programaren parte dira.
Horrela, 19 proiektuk EBren finantziazioa jasoko dute. Guztira, 19 egitasmoetan 1.000 milioi euro inbertituko ditu Europak. Gainera, inbertsio pribatuak beste 900 milioi euroko ekarpena egitea espero dute, Connie Hedegaard Klima Ekintzaren komisarioak prentsaurrekoan azaldu duenez.
19 egitasmo
19 proiektuak EBko 12 estatutan egingo dituzte: Kroazia, Txipre, Danimarka, Estonia, Frantzia, Irlanda, Italia, Letonia, Portugal, Espainia, Suedia eta Erresuma Batua.
"Egitasmo horiekin klima babesten eta ikuspuntu energetikotik Europa burujabeago bat egiten lagunduko dugu", ziurtatu du Hedegaardek.
Aukeratutako ekimenek EBko energia berriztagarrien urteko produkzioa handituko dutela uste du Europako Batzordeak.