Ekonomia -
Baterako enpresa
Araban beste lantegi bat zabalduko du Tubos Reunidosek
Manubeni enpresa japoniarrarekin aliantza izenpetu du konpainia arabarrak.
Erredakzioa
Tubos Reunidos enpresa arabarrak ituna lortu du Marubeni-Itochu Tubulars Europe (MITE) enpresarekin, Manubeni-Itochu Steel konpainiaren filialarekin, eta, horri esker, beste lantegi bat zabalduko du Euskal Autonomia Erkidegoan. 30 milioi euroko inbertsioa eta 80 langile bideratuko ditu fabrika berri honetara, Tubos Reunidosek ohar baten bidez jakinarazi duenez.
Soldadurarik gabeko tutuen fabrikatzaileak Balore Merkatuaren Batzorde Nazionalari jakinarazi dio gaur enpresa berriaren sorrera: enpresaren % 51 Tubos Reunidosena izango da eta % 49 Marubeni-Itochu Tubulars Europe enpresarena.
2016ko lehen hiruhilekoan hasiko da lanean, eta petrolioa eta gasa aurkitzeko erabiltzen diren OCTG Premium produktuak egin eta merkaturatuko ditu.
Mundu zabalean, Afrikan eta Ekialde Hurbilean batez ere, dagoen produktu horien eskariari aurre egin nahi dio Tubos Reunidosek lantegi berri honekin.
Altzairuz egindako produktuak egin, inportatu, esportatu eta merkaturatzen duen enpresa japoniarra da Marubeni-Itochu. 9.500 langile ditu eta 1,94 bilioi yeneko negozio-zifra.