Ekonomia -
EROSKETA
Megapark Barakaldo gunearen zati bat erosi du Larrek, 170 milioian
Lar sozietatea merkatu-aukera berriak aztertzen ari da, kapitala zabaltze aldera. Horren baitan kokatu du operazio berri hau.
AGENTZIAK | ERREDAKZIOA
Lar higiezinen inbertsiorako kotizazio-sozietateak Megapark Barakaldo merkataritza-zentroko bi parte erosi ditu, 170 milioi euroren truke. Balioen Merkatu Nazionaleko Batzordeak eman du erosketaren berri, ohar baten bidez.
OCM Gaudi Master Holdco BV enpresarekin itxi da erosketa. Sozietate hori Oaktree Capital Managementen kontrolpean dago, Elisandra Espain VIII enpresaren akzio guztien jabea.
Hala, Oaktree Capital Managementen esku daude Megapark Barakaldo guneko lokal asko, alokairura bideratuta; denera, ia 60.000 metro karratuko azalera du bere jabegoan.
Egin berri duen erosketa honekin, erositako gunearen % 92 erabilgarri izatea aurreikusi du Larrek. Hasierako etekina % 6,25ekoa izatea ere espero du.
Urrian itxiko da, behin betiko, salerosketa. Dagoeneko, 10 milioi euro utzi ditu Larrek, gordailu modura.
Lar sozietatea merkatu aukera berriak aztertzen ari da, kapitala zabaltze aldera. Horren baitan kokatu du operazio berri hau.
