Ekonomia -
Gazteria eta enplegua
30 urtetik beherakoei egindako kontratuen % 95 aldi baterakoak dira
2014ko azken hiruhilekoaren datuen arabera, euskal gazteen % 48k urtebete baino gehiago zeramaten lan bila.
Agentziak | Erredakzioa
2014ko azken hiruhilekoan Euskal Autonomia Erkidegoko (EAE) 30 urtez azpikoei egindako lan kontratuen % 94,2 aldi baterakoak izan ziren, Espainiako Gazteriaren Kontseiluak gaur zabaldutako datuen arabera. Beraz, kontratuen % 5,8 bakarrik izan ziren mugagabeak.
Hiruhileko horretan, aldi baterako kontratua egin zieten 16-29 urteko 4.002 gazteri, eta horietatik 2.682 kontratu arruntak izan ziren. 2013ko datuekin alderatuta, % 35,11 hazi da mota horretako kontratazioa.
Epe horretan, 1.320 gaztek lortu zuten kontratu mugagabea, aurreko urtean baino % 13,7 gehiagok. Beste muturrean, aldi baterako kontratua lortu zutenak daude. Guztira 65.099 gazteri egin zieten horrelako bat. Horietatik, 22.141k obra edo zerbitzuko kontratua eskuratu zuten (% 3,2 gehiago) eta praktikaldiko kontratua egin zieten 1.890 gazteri. % 46 hazi da kontratazio mota hori.
Espainiako Gazteriaren Kontseiluak jakinarazi duenez, 30 urtetik beherako gazteen % 47,9k urtebete baino gehiago zeramaten lan bila; aurreko urteko epe berean baino % 12,7 gehiago.
Goi-mailako ikasketak dituzten gazteek dute langabezia-tasa txikiena (% 24,5). Derrigorrezko Bigarren Hezkuntzako titulua bakarrik dutenen artean, % 46,2koa da langabezia-tasa, eta % 42,6koa da Lanbide Heziketa egin dutenen artean.