Ekonomia -
LAN GATAZKA
Bizkaiko adinekoen egoitzetan greba egun gehiago deitu dituzte ELAk eta LABek, bakoitzak bere aldetik
LABek hiru greba egun deitu ditu abenduaren 14, 15 eta 16an, eta gainera, hiru eguneko itxialdia egingo dute Atxuriko Gizakundearen elizan. ELAk, bestalde, zazpi eguneko greba deialdia egin du abenduaren 17tik 23ra.
EITB Media
ELA eta LAB sindikatuek, bakoitzak bere aldetik, greba egun gehiago deitu dituzte Bizkaiko adinekoen egoitzetan. LABek abenduaren 14an, 15ean eta 16an mobilizatzeko deia egin du, eta ELAk, berriz, abenduaren 17tik 23ra.
Abenduaren 14, 15 eta 16an greba egitera animatu ditu LABek Bizkaiko adinekoen egoitzako langileak, besteak beste, itunpeko langileak sektore publikokoekin parekatzea eta ratio duinak eskatzeko. Grebaz gain, sektoreko langileek hiru eguneko itxialdia egingo dute bihar 11:00etan hasita Bilboko Atxuri auzoko Gizakundearen elizan.
Bizkaiko adinekoen egoitzetan beste zazpi greba egun deitu ditu ELA sindikatuak, abenduaren 17tik 23ra, langile gehiago kontratatzea eskatzeko.
Greba deialdi horren helburua GESCA, LARES eta ELBE patronalek kudeatzen dituzten egoitzetan langile gehiago kontrata ditzatzen eskatzea da.
ELAren arabera, zerbitzu bera eskaintzeko langile kopuru erdia dute itunpeko nagusien egoitzek Bizkaiko Foru Aldundiaren sareko zentroen aldean.
Sare publikoko langileekin alderatuz gero, itunpekoen soldata % 40 baxuagoa dela ere salatu du ELAk.
Aurten, 14 greba egun deitu ditu ELAk Bizkaiko nagusien egoitzetan.
Abenduaren 17an, manifestazioa egingo dute 17:00etan Arriagatik abiatuta. Abenduaren 18rako, autoen karabana aurreikusi dute Bizkaiko egoitzen inguruan; abenduaren 19an, manifestazioa egingo dute EITBren Bilboko egoitzatik Bizkaiko Foru Aldundira; abenduaren 20an, eskualdeko ekitaldia antolatu dute Ezkerraldean; abenduaren 21ean, kalejiran irtengo dira Bilboko Zazpikaleetan; abenduaren 22an, eskualdeko ekitaldia Ibaizabalen izango da; eta abenduaren 23an, Bilbon egingo den manifestazioarekin amaituko da astea.