Ekonomia -
epaia
Lehia Batzordeak zigortutako EAEko enpresa baten errugabetasuna berretsi du Gorenak
AVEko kontratuak elkarbanatzea egotzita, 1,2 milioi euroko zigorra ezarri zion Espainiako Merkatu eta Lehia Batzordeak Amurrio Ferrocarril y Equipos (AMUFER) enpresari. Zigor hura baliogabetu zuen iaz Auzitegi Nazionalak, eta orain, ebazpen hori baieztatu du Gorenak.
EITB Media
Espainiako Merkatu eta Lehia Batzordeak 2016an zigortutako Amurrio Ferrocarril y Equipos (AMUFER) enpresaren errugabetasuna berretsi du Auzitegi Gorenak, enpresak berak ohar baten bidez jakinarazi duenez. Batzordeak 1,2 milioi euroko zigorra ezarri zion Arabako enpresari, hiru konpainiarekin AVEko kontratuak elkarbanatzea egotzita.
Aurretik, iazko urtarrilean, Auzitegi Nazionalak emandako epaia berretsi du Gorenak. Ebazpenean, Amurrioko enpresak emandako argudioak ontzat eman zituen Auzitegi Nazionaleko Administrazioarekiko Auzien Salak. Konpainiak bere errekurtsoan argudiatu zuenez, zigortutako lau konpainiek aldi baterako enpresa-elkartea osatu zuten Adifen helburua zelako AVEko trenbide osagarri horiek "Espainiako eskarmentu handiko enpresek egitea, puntako teknologiarekin eta oso epe laburrean". Horrela, "ezinbestekoa" zen enpresa-elkarte bat eratzea, teknologiak bateratzeko, eskariaren bolumen handiari zein epe laburrei erantzun ahal izateko. Auzitegi Nazionalak arrazoia eman zion AMUFER enpresari, eta epaiketako kostak ordaintzera zigortu zuen Lehia Batzordea.
Batzordeak, baina, helegitea aurkeztu zuen Auzitegi Gorenean. Urtarrilean emandako epaian, Auzitegi Nazionalaren tesia berretsi du Gorenak. AMUFER enpresak epaitegietan emandako zazpi urteak deitoratu ditu: "Egindako kaltea inork konponduko ez badu ere, denborak arrazoia eman digu eta justiziak argi eta garbi egin du Espainiako Merkatu eta Lehia Batzordearen ebazpen bidegabe horren kontra".