600 tonatik gora hegaluze sartu da gaur euskal portuetan

Hegaluzearen kanpaina martxa onean doa euskal portuetan. Bart gauean 625 tona inguru sartu da. Getarian sartu da kopuru handiena: 300 tona inguru. Hondarribian beste 250 tona hustu dituzte, Ondarroan 40 eta Bermeon 35 tona.

Arrantzaleen hitzetan arrain asko dago eta, gainera, kostaldetik nahikoa gertu. Hori dela eta, Kantauri itsasoko portu gehienetan arrantzatu dute hegaluze asko. Kantabrian 200 mila tonatik gora zenbatu dituzte eta Asturiasen beste 100 mila tona.

Gipuzkoako Kofradien presidente Eugenio Elduaienek baieztatu du "arraina azkar etorri" dela eta "kiloz garai honetarako urterik onena" izango dela 2023a.

Kopuru altuak, ordea, prezioari eragiten dio. Gaur kiloa, bataz beste, 2,80 euroan saldu da lonjetan, iaz baino % 30 merkeago. Kontserba fabrikak arraina merke erosten ari direla esan du Elduaienek.

Harrapaketa ugari izaten ari badira ere, arrantzaleak kezkatuta daude, ontziek kuotak mantendu behar dituztelako eta ezin dutelako nahi beste harrapatu. Iaz hegaluzearen kanpaina ekainetik urrira bitartean egin zuten. Aurten askoz ere lehenago amaituko dutela uste dute. Izan ere, gehienez, 18.805 tona arrantzatu ahal izango dituzte eta, gaur jasotakoarekin, kopuru horren %40ra iritsi dira dagoeneko.