Ekonomia -
GARRAIO PUBLIKOA
Uztailean Bilboko metroan garraio-deskontua aplikatu ez zitzaien erabiltzaileek ordaina jasoko dute
Bizkaiko Garraio Partzuergoaren akats bat tarteko, uztaileko 13 egunetan ez zitzaien deskontua aplikatu erabiltzaileei.
AGENTZIAK| EITB Media
Bizkaiko Batzar Nagusiek aho batez onartu dute, uztaileko lehen 13 egunetan Bilboko metroa erabili eta garraio-deskontua aplikatu ez zitzaien erabiltzaileei ordaina ematea.
Batzar Nagusietan ordezkaritza duten talde guztiek babestu dute EH Bilduk egindako proposamenari EAJk eta PSE-EEk aurkeztutako zuzenketa. Horren arabera, Bizkaiko Garraio Partzuergoak dagozkion neurriak hartu beharko ditu txartela kobratzerakoan egindako "akats" hori "ahalik eta eperik laburrenean" ordaintzeko. Salbuespena Bilboko metroaren 3. linea izan zen, hor deskontuak aplikatu baitziren.
EH Bilduk hasiera batean eskatzen zuen Bizkaiko Garraio Partzuergoak bidaiariei itzuli egin behar ziela uztaileko lehen 13 egunetan gehiegi kobratutako kopurua.
Azkenean onartu den ekimenak, ordea, Garraio Partzuergoaren esku uzten du egun horietan Bilboko metroan bidaiatu zuten pertsonak konpentsatzeko neurriak zehaztea.
Uztaileko lehen egun horietan milaka pertsonak erabili zuten Bilboko metroa, besteak beste, Frantziako Tourraren Bilboko irteerak eta BBK Live jaialdiak bat egin zutelako.