Debabarrenak eta San Markosek hondakinen partzuergoa salatuko dute

Debabarreneko Mankomunitateak eta San Markos Mankomunitateak salaketa jarriko dute Gipuzkoako Hondakinen Partzuergoaren kontra, erraustegiaren eraikuntza gelditzeko ustez eman zuten 13 milioi euroko kalte-ordaina berreskuratzeko.

Arcadio Benitez eta Denis Itxaso bi erakundeetako presidenteek iragarri dute neurria prentsaurreko batean, eta erraustegiaren proiektua gelditzeko erabakia gipuzkoarren "interes orokorren kontrakoa" dela salatu dute.

Gainera, "lanak geldirik egon arren" Partzuergoak "kuota berdina kobratzen" jarraitzen duela, eta herritarrek "erraustegia eraikitzen ariko balira bezala ordaintzen dutela" kritikatu dute.

Bi ordezkariek 13 milioiko kalte-ordaina aipatu badute ere, Partzuergoak azaroan esan zuen 8 milioi eurokoa izango zela.