GHK-k kontuen bahiketa salatu du erraustegiaren 'swap' maileguengatik

Antton Lete GHK Gipuzkoako Hondakinen Kontsortzioko zuzendari nagusiak asteazken honetan erakunde horren kontuak bahitu dituztela salatu du, eta horrek bere "nahiaren kontra" 6 milioi euroko ordainketa dakarrela azaldu du, aurreko legealdian erraustegia finantzatzeko sinatutako "swap" maileguen kontratuengatik.

Letek Donostiako epaitegi batean eman ditu azalpen horiek, erraustegia egiteko sinatutako kontratuen "interpretazio okerra" egin zutela iritzita GHK-k La Caixaren, Banco Santanderren eta Price Waterhouse aholkularitza-enpresaren aurka jarritako salaketaren ondorioz hasi den epaiketaren lehenengo saioan.

GHKren tesiaren arabera, erakunde horiek (Zubietan zaborra tratatzeko azpiegitura eraikitzeko) partzuergoari maileguan ematea aurreikusitako interesak kobratzen ari ziren, aurretik zehaztutako egutegiari jarraituz, eta ez benetan kobratu beharrekoa.

Gaurko deklarazioan, Letek azaldu duenez, bankuak likidazio horiek egiten ari zirela ikusita, GHK-k esan zion bere ustez egutegia "prest zegoen kapitalaren likidazioen arabera egokitu" beharko litzatekeela, hori egin ezean "swap" horiek "produktu guztiz espekulatiboak" izango liratekeelako.