Gizartea -
Garraioak
Gipuzkoarren % 63k Mugi txartela erabiltzen du
Larraitz Ugartek foru diputatuak jakinarazi duenez, 60 milioi bidaia egin dira txartel horrekin iazko martxoan martxan jarri zutenetik.
Gipuzkoarren % 63k Mugi garraio-txartela erabiltzen dute. Guztira, 60 milioi bidaia egin dituzte txartel horrekin iazko martxotik martxan jarri zutenetik, Larraitz Ugarte Gipuzkoako Mugikortasuneko eta Bide Azpiegituretako Departamentuko foru diputatuak jakinarazi duenez.
Lurraldebusen, Euskotrenen eta Donostiako autobusen bederatzi operadorek (Irungo, Errenteriako, Arrasateko eta Hernaniko autobusez gain) erabiltzen dute prezioak integratzeko sistema hori. Bertan sartu ziren azkenak Eibarkoak eta Zarauzkoak dira.
2014an Lasarteko autobusak sartuko dira sistema horretan. Duela urtebetetik ordaintzeko modu bezala erabiltzen da, baina deskonturik gabe, Oiartzungo garraio-autobusetan eta Renfen. Konpainiaren arabera, aurten integratuko dute sistema hori.
Ugarteren esanetan, Gipuzkoako sarean egiten diren bidaien % 86 txartel horrekin egiten dira eta 465.286 txartel daude. Txartelen % 9,24 anonimoak dira eta gainerakoak, pertsonalizatuak.