Gizartea -
Guardiako epaitegia
Bigarren salaketa bat aurkeztu dute apaizen sexu-abusuengatik Granadan
Ustezko sexu-abusuen lekuko batek aurkeztu du salaketa oraingoan. Bere deklarazioa salaketa bihurtu du datu eta izen gehiago eman dituelako.
Erredakzioa
Apaizek ustez egindako sexu-abusuak auzitara eramateko salaketa berri bat aurkeztu dute guardiako epaitegian, Granadan, iturri judizialek EFE albiste-agentziari jakitera eman diotenez.
Bigarren salaketa astelehenean aurkeztu zuten Granadako guardiako epaitegian, baina ez diote hiriko argibideetako 4. epaitegiari igorri oraindik. Auzian sumario-sekretua ezarri dute.
Iturrien arabera, ustezko sexu-abusuen lekuko batek aurkeztu du salaketa oraingoan. Bere deklarazioa salaketa bihurtu du datu eta izen gehiago eman dituelako.
Bigarren salaketa auzian barneratzea ala ez erabaki beharko du argibideetako epaitegiak.
Deklarazioak
Bestalde, lau atxilotuek Granadako polizia-etxean jarraitzen dute. Atxilotuak (hiru apaiz eta laiko bat) Poliziaren aurrean deklaratzen hasi dira. Ofizioko abokatuak dituzte; izan ere, epaileak inkomunikazioa agindu zuen eta ezin dute abokatu propiorik izan.
Asteazken honetan epailearen esku utziko dituztela ziurtatu dute Poliziako iturriek eta iturri judizialek. Bestalde, momentuz atxiloketa gehiagorik egingo ez dutela azaldu du Santiago Perez Gobernuaren Granadako ordezkariordeak.
