Aire Armadaren maniobrek polemika sortu dute Bardean

Maniobrek jarraitu dute gaur Bardeako tiro-eremuan. Aire Armadako 25 hegazkin eta 2.000 soldadu baino gehiago ‘Ekaitza 2015’ ariketan parte hartzen ari dira. Maniobrak ostiral honetan bukatuko dira.

Radio Euskadik jakitera eman duenez, Espainia osoko aire-baseetako F-5 ehiza-hegazkinak, bi C-16 Eurofighter eta F-18 hegazkinak ariketan parte hartzen ari dira. Maverick misilak, laser-bonbak, suziri antiaereoak eta babeserako bengalak jaurti dituzte azken hiru egunetan.

Armamentu mota hori erabiltzen duten aurreneko aldia da. Tiro-eremuaren aurkako Nafarroako Asanbladak maniobren aurka protesta egin du berriro; izan ere, tiro-eremua ixtea eskatzen bi hamarkada baino gehiago daramatza jadanik. ‘Ekaitza 2015’ ariketa ostiral honetan bukatzen da.

Soldadu bat lehergailuen eztandei begira Bardean (Nafarroa). Argazkia: EFE

Ekainak 6, manifestazioa

Tiro-eremuaren aurkako Asanbladak manifestazioa deitu du ekainaren 6rako, Bardeako eremuan tiro praktikak betirako amaitzea eskatzeko.

Tiro-eremua paradoxikoki biosfera erreserba da, baina 50 urte baino gehiago daramatzate maniobra militarrak bertan egiten.