Gizartea -
Ez du inor zauritu
Leherketa batek kalteak eragin ditu Lasarte-Oriako Michelin lantegian
Gauerdia baino lehen, galdara bat lehertu eta eztanda handia izan zen, baina eztandak ez zuen langilerik harrapatu. Lasarte-Oriako bizilagunek susto galanta hartu zuten.
eitb.eus
Lasarte-Oriako (Gipuzkoa) bizilagunek susto galanta hartu zuten atzo gauerdia baino lehen, baina ez zuen ondorio larririk izan. Michelinen lantegian galdara bat lehertu eta eztanda handia izan zen, baina ez zen langilerik zauritu, eta kalte materialak besterik ez zuen eragin, Euskadi Irratiak jakitera eman duenez.
Ertzaintzaren eta Lasarte-Oriako Udaltzaingoaren patruilak, suhiltzaileak eta anbulantzia medikalizatu bat bertaratu ziren, hainbat herritarrek SOS Deiak larrialdietarako zerbitzura deitu eta gero, baina ez zen inor zauritu eta ez zen isuririk izan.
Itxura batean, galdara handi batean gertatu zen leherketa, baina ez zegoen langilerik inguruan, eta, beraz, sustoa besterik ez zen izan.