Gizartea -
barne hauteskundeak
Nekane Balluerka, EHU zuzentzeko hautagai bakarra
Egungo errektoreordeak boto guztien herena baino gehiago lortu beharko ditu errektore bihurtzeko.
AGENTZIAK | ERREDAKZIOA
Nekane Balluerka EHUko errektoreordea da EAEko unibertsitate publikoaren errektore izateko hautagai bakarra, ostegun honetan bukatu baita hautagaitzak aurkezteko epea.
Bozketa hilaren 24an egingo dute, eta, hautagai bakarra dagoenez, itzuli bakarra egingo dute.
Balluerkak boto guztien herena baino gehiago lortu beharko ditu errektore bihurtzeko.
Bozketa haztatua izango da: irakasle doktore iraunkorren botoek % 56,25eko balioa izango dute; irakasle ez doktore iraunkorrenek, % 7,50ekoa; gainerako irakasle eta ikertzaileenek, % 2,09koa; ikasleenek, % 22,08koa; eta administrazioko langileenek, % 12,08koa.
Balluerka (Ordizia, Gipuzkoa, 1966) Psikologian doktorea da, eta AEBn eta Erresuma Batuan egin du lan.
Iñaki Goirizelaia egungo errektorearen kolaboratzaile estua izan da, baina bere proiektua ez dela “kontinuista” izango azaldu du.
Besteak beste, hauek dira Balluerkak iragarritako proiektuak: Medikuntza fakultate berriko lanak hastea eta euskarako graduen eta gradu-ondokoen eskaintza handitzea.