Gizartea -
Emakumeen aurkako indarkeria
Bi gizon atxilotu dituzte Gasteizen, bikotekideei jotzea egotzita
28 eta 34 urteko gizonezkoak atxilotu egin dituzte, bikotekideei eraso egitea leporatuta, eztabaida artean.
Agentziak | Erredakzioa
Bi gizon (28 eta 34 urte dituzte) atxilotu dituzte Gasteizen, bikotekideei eraso egitea egotzita, eztabaida artean.
Lehenengo ustezko erasoa larunbat gauerdian izan zen. 24 urteko emakume batek Udaltzaingoari deitu zion, bikoteak, etxera itzultzean, kolpatu egin zuela esanez, Lakuabizkarra auzoan, Udaltzaingoak astelehen honetan jakitera eman duenez.
Emakumeak agenteei esan zienez, mutil-laguna oso urduri zegoen etxera iritsi zenean, eta hilabete batzuetako semea esnatu zuen, eztabaida bat hasiz. Une batean, gizonezkoak belarrondokoa eman zion, eta, jarraian, burukada bat. Lesioak berretsi egin zituzten agenteek.
Ustezko erasotzaileak ukatu egin zuen bikotekideari erasotzea, baina “eztabaida txiki” bat izan zutela azaldu zuen. Biktimak zituen lesioak ikusita, agenteek gizonezkoa atxilotu zuten, genero-indarkeria egotzita.
Bigarren atxiloketa ordu batzuk geroago izan zen, 07:00ak aldera, igandean, Salburua auzoan.
Emakume batek Udaltzaingoaren laguntza eskatu zuen, behin etxera itzulita, bikotekidearekin izandako “eztabaida handi” baten ostean, ustez iletik heldu eta hainbat bultzada eman zizkiolako.
Bere etxera joan zen gizonezkoa zertxobait geroago aurkitu zuen patruilak. 34 urteko susmagarriak ukatu egin zuen gertaera, baina une batean agenteen aurka egin zuen, haiek bultzatuz, eta ostikadak eta ukabilkadak ematen saiatu zen, beraz, atxilotu egin zuten.
__________________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
