Gizartea -
Osasuna
Sei pertsona hil dira EAEn gripearen epidemia hasi zenetik
Hildakoen batez besteko adina 77 urtekoa zen, guztiek arrisku faktoreak zituzten, eta horietako bik ez zuten txertoa hartu.
AGENTZIAK | ERREDAKZIOA
Sei pertsona hil dira Euskal Autonomia Erkidegoan (EAE)gripearen aurtengo epidemia hasi zenetik, horietatik bost 2017. urtearen hasieran.
Eusko Jaurlaritzako Osasun Sailak gripearen intzidentziari buruzko datuak argitaratu zituen atzo, eta urteko lehen astean 100.000 biztanleko 341,6 kasu izan direla jakinarazi zuen. Dena den, ez zuen hildakoen inguruko xehetasunik eman.
Osakidetzak jakinarazi duenez, gripearen ondorioz ospitaleratutako pertsonetatik sei hil dira epidemia hasi zenetik.
Hildakoen batez besteko adina 77 urtekoa zen: gazteenak 46 urte zituen eta zaharrenak, berriz, 93. Halaber, sei hildakoetatik lau emakumeak ziren.
Bestalde, guztiak ere arrisku taldeetakoak ziren, eta horietako bik ez zuten txertoa hartu.