Gizartea -
Bizkaia
82 urteko gizon bat hil dute labankadaz Bilbon
Udaltzaingoak 81 urteko beste gizon bat atxilotu du erasoaren ustezko egilea delakoan. Gertakaria Santutxun jazo da.
AGENTZIAK | ERREDAKZIOA
82 urteko gizon bat hil dute labankadaz Bilboko Santutxu auzoan, eta Udaltzaingoak 81 urteko beste gizon bat atxilotu du gertakariarekin lotura duelakoan.
Segurtasun Sailak jakinarazi duenez, 17:15 inguruan abisu bat jaso dute Santutxuko Santa Clara kalean gizon bat lurrean botata eta odoletan zegoela ohartarazita.
Oraindik argitu gabe dauden arrazoiak tarteko, adineko batek besteari labankada eman dio. Biktima berehala zendu da, eta erasotzailea ihesean joan da.
Alabaina, lekukoen laguntzari esker, Udaltzaingoak nondik joan den jakin du eta handik denbora batera atxilotu egin dute.
Ertzaintzak ikerketa bat jarri du abian. Ingurua hesitu dute eta erasotzaileak erabili duen labana bilatzen ari dira.
(Polizia zientifikoa Santutxuko Santa Clara kalean. Argazkia: EFE)