Gizartea -
Bide Segurtasuna
Irungo Behobia eta Artia-Azken Portu arteko zatian abiadura muga 30 km/h-ra murriztea eskatu dute bizilagunek
25.000 ibilgailu baino gehiago igarotzen dira egunero Juan Thalamas Labandibar kaletik. Azken Portu kiroldegiaren, pasealekuaren eta bidegorriaren erabiltzaileek edo kale horretan geralekuak dituzten hiriko eta eskolako autobusen erabiltzaileek asko erabiltzen dute. "Puntu beltza" dela diote.
Olatz Prat | EITB Media
Irungo bizilagunek Juan Thalamas Labandibar kalean abiadura 30 km/h-ra murrizteko eskatu dute larunbat honetan, Behobia eta Artia-Azken Portu arteko tartean, izan ere, salatu dutenez, "istripuak gertatzen dira oraindik" bertan eta "puntu beltza" da. Gaur egun, tarte horretako muga 50 km/h-koa da.
Salatu dutenez, egunero 25.000 ibilgailu baino gehiago igarotzen dira herri barruko bidetik, horietako asko kamioiak, eta horietako batzuek salgai arriskutsuak garraiatzen dituzte.
"Ibilgailuen kopuru handi hori jasan behar dute egunero auzo horietako biztanleek, oinezkoentzako pasealekua eta bidegorria erabiltzen duten oinezkoek eta txirrindulariek, Azken Portu kiroldegiko erabiltzaileek eta kale horretan geralekuak dituzten hiriko eta eskolako autobusen erabiltzaileek!", adierazi dute.
Azaldu dutenez, "hamabost hilabeteko lan gogorraren ondoren, bide administratiboa eta politikoa agortu dira" egoera konpondu gabe: egoera hori, aldarrikapena bultzatzen duten erakundeen arabera, "inguru horren gainean dauden interes pribatu eta politikoen erruz da".
Gaur argitaratu duten oharraren arabera, "ez Irungo Udaleko Osoko Bilkurak duela urtebete aho batez hartutako erabakiak, ez Arartekoak egindako jarduerek, ez sustatzaileek hasitako espedienteek" ez dute emaitzarik eman.
Era berean, gogorarazi dute udalbatzaren akordio horrek abiadura 30 km/h-ra mugatzea jasotzen zuela, baina, horrez gain, "trafikoa mantsotu eta baretzea" aurreikusten zuela, mugikortasun segurua eta iraunkorra lortzeko ez ezik, airearen kutsadura nahiz kutsadura akustikoa murrizteko.
Hala ere, salatu dute egoerak berdin jarraitzen duela eta "istripuak gertatzen dira oraindik". Horregatik guztiagatik, "'Protesta y sobrevive' (kexatu eta bizirik iraun) lelopean, trafiko-mozketen kanpaina hasi dute, istripuak salatzeko eta biktimak oroitzeko". "Bide-segurtasunaren eta bizi-segurtasunaren, osasunaren, osotasun fisikoaren eta pertsonen bizitzaren alde", adierazi dute.