Gizartea -
Indarkeria matxista
Epaileak behin-behineko kartzelaldia ezarri dio Tolosako osteopatari
Sexu-erasoa egotzita, haren kontra sei salaketa aurkeztu dituztela eta ihes egiteko arriskua dagoela argudiatuta hartu du erabakia epaileak. Orain arte, kargupean aske zegoen gizona.
Agentziak | EITB MEDIA
Tolosako Lehen Auzialdiko eta Instrukzioko 3. epaitegiak kartzelara bidali du, komunikatuta eta fidantza barik, hainbat emakumeri sexu-erasoa egitea egotzita ikertzen ari diren Tolosako osteopata. Orain arte, kargupean aske zegoen.
EAEko Justizia Auzitegiak eta Segurtasun Sailaren arabera, asteon beste lau emakumeren salaketak jaso ostean erabaki dute gizona bigarrenez atxilotzea.
Epaileak lau emakumeak eta auzipetua bera galdekatu ditu, eta Fiskaltzaren eskaerari men eginda, espetxeratzeko agindua eman du.
Epaileak kontuan hartu ditu gizonaren kontra dauden salaketa kopurua (sei) eta, jar dakiokeen zigor handia tarteko, ihes egiteko arriskua.
Sei emakumek salatu dute osteopata, masajeak ematen ari zela ukituak eta sexu-askatasunaren kontrako ekintzak egitea egotzita. Ikerketa zabalik dago oraindik, eta ez da baztertzen biktima gehiago azaltzea.