Gizartea -
Falangearen aurkako protesta
15 lagun atxilotu dituzte Falangearen deialdiko istiluetan, Bilbon
Ertzaintzak 50 lagun inputatu ditu, gehienak Falangeko kideak. Gainera, 26 beisbol makil eta eskumuturreko amerikarrak kendu dizkie.
Erredakzioa
La Falange, Nudo Patriota Español eta Vieja Escuela Madrid taldeek deituriko elkarretaratzeak istilu larriak eragin ditu. Ertzaintzak mugimendu antifaxistako 14 lagun atxilotu ditu eta Falangeko beste bat, Herrizaingo Sailak adierazi duenez. Halaber, Ertzaintzak 50 bat lagun inputatu ditu, gehienak, beisbol makil eta eskumuturreko amerikarrak zeramatzatenak. Atxilotuei Herritaren Segurtasunerako Legearen aurkako delituak egotzi dizkiete.
Gazteak Falangearen bilkuraren aurka protesta egiteko bildu direnean sortu dira istiluak. Ertzaintzak Buenos Aires kalean kargatu du.
Hainbat lagunek edukiontziak gurutzatu eta barrikadak jarri dituzte Bilboko Diego Lopez de Haro kale nagusian, Ertzaintzak baieztatu duenez.
Falangea 13:30ean bildu da Albia lorategian eta Ertzaintza bertara iristea ekiditeko zaintza lanetan dago.
13:00etan, barrikadak jartzen eta edukiontziak gurutzatzen hasi dira hainbat gazte. Halaber, harriak bota dituzte eta Ertzaintzak gazteen aurka egin du Buenos Aires kalean eta hainbat lagun atxilotu ditu.
Falangeko kideek beisbol makilak zeramatzaten
Bestalde, Ertzaintzak Falange, Nudo Patriota Español eta Vieja Escuela taldeetako hogei lagun identifikatu ditu eta 26 beisbol makil eta eskumuturreko amerikarrak kendu dizkie.
Elkarretaratzea 13:00etan egin dute, baina 14:30ak aldera, hiru autobus iritsi dira eta Mazarredo kalean gelditu dira, Albiako lorategien ondoan.
Ertzaintzak autobusetik jaistea eragotzi die eta une horretan su-itzalgailuak hustu dituzte ertzainen aurka. Ondoren, jaisteko baimena eman diete eta Ertzaintzak hogei lagun identifikatu ditu.