Mundua -
Siria
Mugarik Gabeko Medikuak elkarteko bost kide bahitu dituzte Sirian
Bahitutakoak espainiar bat eta hainbat frantziar eta alemaniar direla zabaldu den arren, erakundeak argitu du informazio hori ez dela ''zehatza''.
Erredakzioa
Mugarik gabeko Medikuak gobernuz kanpoko erakundeko bost kide europar bahitu dituzte Irak eta Siriako Estatu Islamikoa Al Kaidarekin lotutako taldeko milizianoek Siriako ipar-ekialdean, Latakia probintziako ospitale batean.
Abu Hasanek, Sham oposizioko sareak Latakian duen ordezkariak, azaldu duenez, gatibu eraman dituzten bost pertsona horien artean espainiar bat dago eta gainerakoak frantziar eta alemaniarrak dira, eta auzitegi islamiar batek galdekatuko ditu, Turkiako inteligentzia zerbitzuei laguntzea leporatuta.
Medikurik gabeko Medikuek taldeko bost kide bahitu dituztela eta “galdeketa bat-edo" egingo dietela berretsi dute, baina ez dute datu gehiagorik eman, “segurtasun arrazoiengatik”. Taldeak ez du baieztatu gatibu hartu dituztenen herritartasuna, eta zabaldutako informazioa ''zehatza'' ez dela argitu du.
Ildo horretan, Frantziako Atzerri Ministerioak baieztatu egin du ez dagoela frantziar herritarrik bahitutakoen artean.
Gobernuz kanpoko erakundearen ordezkariek esan dutenez, uneoro daude bost bahituen familiekin harremanetan, eta ahal duten guztia egiten ari dira Siriako lankideekin hitz egiteko.
2013an oso ohikoa izan da, tamalez, Siriako iparraldearen kontrola duten matxino muturrekoenek GKEentzat lanean ari diren atzerritarrak bahitzea.