Mundua -
Krisia Italian
Napolitanok Renzi deitu du Gobernu berria osatzeko
Alderdi Demokrataren buruak, eta aurreikuspen guztien arabera Italiako hurrengo presidenteak, Zentro Eskuin Berria alderdiaren babesa lortu beharko du.
Erredakzioa
Giorgio Napolitano Italiako Errepublikako Estatu burua Matteo Renzi (39 urte) Alderdi Demokratako (PD) buruarekin bilduko da bihar, astelehena, 10:30ean, Gobernu berria osatzea eskatzeko, Estatu Zuzendaritzak zabaldutako ohar baten arabera.
Atzo, larunbata, bilera sorta bukatuta, gogoeta egun bat igaro eta gero, Napolitanok, aurreikuspen guztiek esaten zutenez, Florentziako alkatea deitu du eta orain Gobernu berria osatzea eskatuko dio, baina oraindik ezagutzeke dago zeintzuk diren jarriko dizkion baldintzak.
Baliteke Napolitanok Renziri beste bilera sorta bat egitea eskatzea, babes nahikorik duen baieztatzeko.
Maria Elena Boschi PDko idazkari nagusiak aurreratu zuen Napolitanok Renzi deitu eta gero, seguruenik, "zenbait egun" beharko lituzketela.
Renzik Florentzian igaro du ia egun osoa, bilerak egiten eta zentroeskuinaren babesa jaso beharko duen programa bat zehazten.
Litekeena da Renzi Erromara bueltatzea gaur arratsaldean, Angelino Alfano Zentro Eskuin Berria alderdiko buru berriarekin izateko, Alfanoren babesa ezinbestekoa baita.
Napolitanorekin bildu eta gero, Alfano Zentro Eskuin Berriko ordezkari eta Silvio Berlusconiren oinordekoak zenbait baldintza jarri zituen Renziri babesa emateko, besteak beste, programak ez duela "ezkerrerako joera hartu" behar eta zentroeskuinaren ideiak jaso behar dituela.
Diputatuen Ganberan, Renzik ez luke arazorik izango inbestidura saioan babes nahikoa lortzeko, ez ordea Senatuan, PDk 107 eserleku baititu, eta gehiengo osoa 161 eserlekutan dago; hori dela eta, Alfanoren alderdiko 31 senatarien babesa lortzea ezinbesteko du Renzik, baita UDC-Italiako Popularren 12en babesa ere, zenbait talde txikiren babesaz gain.
