Mundua -
Bahiketa
Frantziako bost langile bahitu dituzte Nigerren
Bertako uranio meatzetan interesak dituzten Areva talde nuklearreko eta Sogea-Satom eraikuntza konpainiako beharginak dira.
Erredakzioa
Bost langile frantses bahitu dituzte Nigerren, Frantziako Presidentetzak gaur jakinarazi duenez. Afrikako herrialde horretan uranio mehatzeak ustiatzen ari den Areva enpresakoak eta Sogea-Satom eraikuntza konpainiakoak dira langileak. Horiekin batera, Togoko beste pertsona bat eta Madagascarreko beste bat ere bahitu dituzte.
Hasiera batean, Areva talde nuklearrak bart bere behargin bi bahitu dituztela onartu du. Kanpo Harremanetarako Frantziako Ministerioak Eliseoak emandako informazio urriak errepikatu baino ez du egin eta goizeko azken orduan xehetasun gehiago emango dituela esan du.
Iragan uztailaren 21ean Michel Germaneau frantziarra bahitu zuten Nigerren eta uztaila bukaeran Al Qaedak hil egin zuen Magreben, Frantziak eta Mauritaniak Germaneau askatzeko asmoz Al Qaedaren kontra ekintza militar bat egin ostean.