Mundua -
Medikuaren txostenaren arabera
Strauss-Kahn salatu zuen langilea bortxatu egin zuten, medikuen ustez
Nazioarteko Diru Funtseko zuzendari ohiaren abokatuek New Yorkeko ospitalearen txostena biktimaren abokatuen estrategia "iruzurti eta maltzurra" dela salatu dute.
Erredakzioa
Strauss-Kahn Nazioarteko Diru Funtseko zuzendari ohia salatu zuen New Yorkeko Sofitel hoteleko langilea bortxatu egin zutela ondorioztatu dute egun hartan artatu zuten medikuek.
Iragan maiatzaren 14ean (ustezko erasoaren eguna) Manhattaneko St. Luke's Roosevelt ospitaleko medikuek Nafisatou Diallo artatu zuten, eta egin zuten txostenaren arabera, emakumeak bortxaketa batean pairatuta hainbat zauri zituen.
"Diagnostikoa: erasoa. Zaurien jatorria: Bortxaketa", L'Express astekari frantsesak argitaratutako txostenaren ondorioen arabera. Horien arabera, Diallo anbulantzian heldu zen ospitalera, bere kabuz ibiltzeko gai zen eta polizia batekin agertu zen.
Txostenak emakumearekin egon ziren erizainen adierazpenak ere jaso ditu, eta horien arabera, hoteleko langile horrek sexu-eraso bat jasan zuela esan zuen.
Txosten "iruzurtia"
Zuzendari ohiaren abokatuek New Yorkeko ospitalearen txostena ustezko biktimaren abokatuen estrategia "iruzurti eta maltzurra" dela salatu dute.
Defentsak adierazi duenez, Manhattaneko ospitaleak igorritako txostena Nafisatou Dialloren adierazpenetan bakarrik oinarritzen da, eta "behin eta berriro" frogatu da emakumeak esaten duena "ez dela sinesgarria".