Mundua -
Oposizioaren arabera
Indarkeriak hildakoak eragin ditu berriro ere Sirian, 61 gutxienez
Zehaztu gabeko "talde terrorista" baten ekintza izan dela adierazi dute agintariek. Lekukoen arabera, erasotzaileek zaurituak zeramatzaten anbulantzien kontra ere tiro egin dute.
Erredakzioa
Gutxienez 61 pertsona hil dira, gehienak Idleb probintzian, larunbat honetan Sirian izandako indarkeriaren ondorioz, Tokiko Koordinazio-Batzordea oposizioko taldeak salatutakoaren arabera.
Hildakoen artean Idlebeko Ospitalean aurkitutako 30 hilotzak zenbatu dituzte, identifikatu gabeak, eta presoak eramaten zituen autobus batean, leherketa baten ondorioz, izandako 15 hildakoak.
Gainera, beste hiru pertsona hil dira gutxienez Homs probintzian, Siria erdialdean, bi Damaskoko inguruetan eta bat Dir Al-Zuren, Irakeko mugatik gertu.
Zehaztu gabeko terroristak
Hilketen arduraduna zehaztu gabeko "talde terrorista" bat izan dela adierazi dute Siriako agintariek. Sana agentzia ofizialak, aldiz, erasotzaileek zaurituak zeramatzaten anbulantzien kontra tiro egin dutela azpimarratu du.
