Euskadin guardia zibil gehiago behar direla aldarrikatu du De Andresek

Javier de Andres Espainiako Gobernuak Euskal Autonomia Erkidegoan duen ordezkariak Guardia Zibilaren lana goraipatu du, eta herritarrei segurtasuna eta babesa emateko Euskadin guardia zibil gehiago beharko liratekeela adierazi du.

Azaldu duenez, Guardia Zibilak 1.135 kilo droga atzeman zituen (merkatuan 29 milioi euroko balioa izango zuen), zazpi gaizkile talde antolatu desegin zituen eta terrorismo jihadistaren aurkako hainbat polizia operazioetan parte hartu zuen.

Espainiako Gobernuak Euskadin duen ordezkariak Guardia Zibilaren lanari buruzko txostena aurkeztu du gaur Gasteizen egindako prentsaurrekoan. De Andresen esanetan, Guardia Zibilak lan handia egiten du herritarren segurtasuna bermatzeko eta horien eskubideak defendatzeko.

"Guardia Zibila ez dago guztiz osatuta; are gehiago, Euskadi da Espainia osoan hutsune gehien dituen lurraldea", azaldu du.

Hori dela eta, Euskadik behar duena ez dela guardia zibilak gutxitzea nabarmendu du.