Futbola
Abenduaren 10etik
Euskal Selekzioaren partida ikusteko sarrerak, salgai
eitb.eus
20 eta 25 euro arteko prezioa dute. Euskal Selekzioa - Katalunia partida jokatuko duten jokalarien izenak abenduaren 21eko futbol jardunaldiaren ostean iragarriko dituzte.
-
Euskal Selekzioa-Tunez partidako sarrerak. Efe.
Gaur jarri dituzte salgai Euskal Selekzioaren eta Kataluniaren arteko futbol partidarako sarrerak. Neurketa abenduaren 28an jokatuko dute, San Mamesen, 20:30etik aurrera.
Sarrerak aurreko urteetako bideetatik lortu ahal izango dira: Kutxabankeko kutxazainetan, Euskadiko Futbol Federazioaren webgunean, lurraldeetako federazioen egoitzan eta San Mameseko txarteldegietan.
Sarrerek 20 eta 25 euro bitarteko prezioa izango dute.
Partida aurkezteko prentsaurrekoan, Jon Redondo Jaurlaritzako Kirol zuzendariak esan du aurtengo partida "ziklo baten amaiera" dela, eta aurrerantzean FIFAko egutegiaren barruan jokatu behar duela Euskal Selekzioak, Top Ten delakoan sartzen diren selekzioen aurka.
Bestalde, eta partida jokatuko duten jokalariei dagokienez, oraindik jokalariekin ez dutela hitz egin adierazi dute Jose Mari Amorrortu eta Miguel Etxarri hautatzaileek. Hala ere, Ingalaterran ari direnak ez dira etorriko, Premier Leaguen liga jardunaldia dutelako.
Jokalarien zerrenda abenduaren 21ean emango dute, asteburu horretako liga jardunaldia amaitu ostean.
>
