Futbola
Munduko Futbol Txapelketa
Kolonbia eta Maroko final zortzirenetarako sailkatu dira, Munduko Futbol Txapelketan; Alemania, kanporatuta
EITB MEDIA
H multzoko azken jardunaldian, Marokok 1-0 menderatu du Kolonbia, eta Alemaniak 1-1 berdindu du Hego Korearekin. Hala, Maroko eta Kolonbia final zortzirenetako kanporaketetan izango dira, eta Frantzia eta Jamaika izango dituzte aurkari, hurrenez hurren.
-
Chebbak (Maroko) eta Usme eta Arias (Kolonbia), jokaldi batean. Argazkia: EFE.
Kolonbia eta Maroko Australian eta Zeelanda Berrian jokatzen ari diren Munduko Futbol Txapelketako final zortzirenetarako sailkatu dira, ostegunean, multzoen fasea H multzoko aurreneko bi postuetan amaituta, eta Alemania, ordea, txapelketatik kanpo geratu da, lehen fase hori multzo horretako hirugarren postuan bukatu baitu. Aurreneko fasearen hirugarren eta azken jardunaldian, Marokok Kolonbia menderatu du, 1-0, eta Alemaniak 1-1 berdindu egin du Hego Korearekin; horrenbestez, Marokok eta Kolonbiak Frantzia eta Jamaika izango dituzte aurkari, hurrenez hurren, final zortzirenetan, hilaren 8an.
Testuinguru horretan, Kolonbiako selekzioak, H multzoko irabazlea bera, Marokoren aurka galdu du, Perthen (Australia). Anissa Lahmarik egin du Marokoren gola, lehen zatiaren luzapenean, penalti baten aldaratzea baliatuta. Kolonbiak, nahiz eta galdu, sailkatzea eskuratu du, bai eta Marokok ere; azken selekzio hori lehen aldiz ari da jokatzen Munduko Txapelketa bat.
Bitartean, Brisbanen (Australia), Alemania, 2003an eta 2007an txapelduna bera, lehen aldiz geratu da multzo fasean txapelketatik at. Garaipena behar zuen final zortzirenetarako sailkatzea bermatzeko, baina ezin izan du Hego Korea mendean hartu; izan ere, bana egin dute Alemaniak eta Hego Koreak, oso estua izan den neurketan.
Alexandra Poppek egin du Alemaniaren gola. Argazkia: EFE.
Cho So-Hyunek sartu du Hego Korearen gola, seigarren minutuan, eta Alexandra Poppek jarri du berdinketa, lehen zatia amaitzeko hiru minutu geratzen zirela, burukada bikain baten bidez. 56. minutuan, gol bat baliogabetu diote Alemaniari, epaileak jokoz kanpo adierazi baitu, eta beste erremate batek langan jo du, eta, ondorioz, Alemania kezkatzen hasi da, bigarren gola ezin baitzuen sartu; azkenean, nahiz eta 16 minutuko luzapena izan den, markagailua ez da berriro aldatu, eta Alemania txapelketatik kanpo dago.
Final zortzirenetan, Kolonbia-Jamaika partida asteartean jokatuko dute, hilaren 8an, Euskal Herriko 10:00etan, Melbournen (Australia), eta Frantzia Maroko kanporaketa, aldiz, egun horretako 13:00etarako dago aurreikusita, eta Adelaiden jokatuko dute.
