Bilbao Basket
Taldean jarraituko du
Alex Reyesek Bilbao Basketen jarraituko du
EITB MEDIA
Horrela, hegalekoak laugarren denboraldia egingo du Bizkaiko taldean. 2022-23 denboraldian, Reyesek (29 urte) 7,4 puntu sartu eta 3,1 errebote hartu ditu partidako, eta jokalari internazional gisa estreinatu da, Espainiako selekzioan.
-
Alex Reyesek Bilbao Basketen jokatuko du, 2023-24 denboraldian ere. Argazkia: Surne Bilbao Basket.
Alex Reyes hegalekoak Surne Bilbao Basketen jarraituko du 2023-24 denboraldian, asteazkenean Bizkaiko klubak baieztatu duenez. Hortaz, Reyesek laugarren urtea egingo du Bilbao Basketen; Jaume Ponsarnauk jarraituko du taldea entrenatzen, eta, orain arte, bost jokalari ditu egiaztatuta hurrengo denboraldirako.
2020-21 denboraldian jokatu zuen lehen aldiz Bilbon, eta, batez beste, 3,8 puntu sartu eta 1,7 errebote hartu zituen partidako; 2021-22an, 5,2 puntu sartu eta 2,2 errebote hartu zituen; eta 2022-23an, 7,4 puntu sartu eta 3,1 errebote hartu ditu partidako. Klubaren iritziz, Endesa Ligan "sendotu" egin da.
Otsailean, Reyesek debuta egin zuen jokalari internazional gisa, Espainiako selekzioan. Espainia-Italia partida jokatu zuen, Caceresen, bere jaioterrian.
Reyesek 2024ra arte sinatu zuen duela urtebete Bilbao Basketekin. Oraingoz, horrez gain, beste hauek dira ziurrak Bilboko klubean 2023-24 denboraldirako: Tomeu Rigo, Adam Smith, Xavi Rabaseda eta Denzel Andersson.
