Bilbao Basketek 19 puntu irauli behar dizkio Legia Varsoviari, Miribillan, FIBA Europe Cupen jarraitzeko

Surne Bilbao Basket FIBA Europe Cupeko finalerdietarako sailkatzea eskuratzen ahaleginduko da asteazkenean, 20:00etatik aurrera, Miribillan; horretarako, gutxienez 19 puntuko aldeaz menderatu beharko du Legia Varsovia final laurdenetako itzuliko partidan, kontuan izanik Poloniako taldeak, joanekoan, aurreko asteazkenean, bere etxean, alde hori erdietsi zuela. Varsoviako markagailua tarteko, Jaume Ponsarnauren gizonek partida oso ona egin beharko dute, Miribillako zaleek lagunduta. Neurketa EITBn izango da ikusgai, zuzenean, eitb.eus-en eta ETB4n.

Horretarako, besteak beste, Bilbao Basketek Alex Reyes hegalekoa izango du. Reyes ondo dabil, igandean Granadan erakutsi zuenez; orduan, Endesa Ligan, 29 puntu sartu zituen, eta zortzi hiruko saskiratze lortu, hamar jaurtiketatan. Nabarmentzekoa da, halaber, Bilbao Basketek, denboraldi honetan bertan, FIBA Europe Cupen, behin baino gehiagotan irabazi duela 19 puntuetatik gorako aldeaz; hori bai, aurkariak, neurketa horietan, ez ziren Legia Varsovia bezain indartsuak.

Ponsarnauk ez du Xavi Rabaseda kapitaina izango. Baja hori oso garrantzitsua da, Rabasedak ekarpen handia egiten baitio taldeari, bereziki defentsan; gainera, jokalari guztientzako erreferentzietakoa da, kantxan eta kantxatik kanpo ere bai.

Legia Varsovian, Marek Popiolek entrenatzaileak Christian Vital estatubatuarra izango du; Vital txapelketako saskiratzailerik onena da, eta joanekoan, gainera, Aric Holman eta Josip Sobin ere aritu ziren ondo.

Norgehiagoka 20:00etan hasiko da, eta EITBn izango da ikusgai, zuzenean, eitb.eus-en eta ETB4n.