televisión
Gaueko 22:00etan, astelehenean
ETB-2k 'Carrero Blanco, el consejero fiel' estreinatuko du
A.E.
EITB
Jesus Lopez Jordan zuzendari eta gidoilariaren lanak almirantearen bizitzaren errepaso zehatza egingo du, Cantabriako Santoñan jaio eta ETAk hil zuen arte.
ETBko bigarren kateak Carrero Blanco, el consejero fiel BocaBocak ekoiztu eta Jesus Lopez Jordanek zuzendutako dokumentala estreinatuko du astelehenean 22:00etan. Nor zen Carrero Blanco? Nola lortu zuen Francoren kolaboratzaile estua izatea? Ze ondorengo utzi zuen diktadorearen aholkulari leial eta ezinbesteko bilakatu zen gizonak?
Galdera horietako batzuk erantzungo ditu Carrero, el consejero fiel dokumentalak. Jesus Lopez Jordan zuzendari eta gidoilariaren lanak almirantearen bizitzaren errepaso zehatza egingo du, Cantabriako Santoñan jaio zenetik, ETAk hil zuen arte.
Dokumentalak Carreroren bizitzaren hainbat alderdi zintzoki jasotzen ditu: Armadan egindako ikasketa militarrak, Gerra Zibilean kolpea eman zutenen aldeko jarrera; bere trebetasuna txosten militarrak idazteko eta Francok lan horrengatik eskaini zion konfidantza, eta Masoneria eta komunismoari zion gorrotoa.
Hori guztiari buruzko irudiak topatzeko lan handia egin da eta lekuko asko bildu dituzte. Besteak beste, Carlos Fernandez Santander, Javier Garcia de Cortazar eta Charles Powell historialariarenak, Utrera Molina eta Carrillo politikoenak, eta Luis eta Carmen seme-alabenak.
Frankismoaren azken garaia Gobernuko Presidente izan zen gizonaren beste alderdi ezezagunak ere erakutsiko dituzte. Esate baterako, zenbait politiko ezin zituen ikusi eta horretaz ere arituko dira dokumentalean. Fraga, esate baterako, liberalegitzat zuen Carrero Blancok, eta horregatik arriskutsua zen bere ustez. Ez zen oso ezaguna ezta ere bere idazle emaria eta marrazkiak egiteko zuen zaletasuna. Horrez gainera, prest zegoen aita santuak bera eskumiatzeko Franco ez zigortzeko.
Jesus Lopez Jordan zuzendariarekin batera, Ricardo de Gracia errealizadore eta kamerak eta David F. Millares eta Macarena Rey produktore eragileek parte hartu dute talde teknikoan.
Carrerori buruzko telesaila
Carrero Blancoren dokumentala El asesinato de Carrero Blanco telesailaren atarikoa da. BocaBocak ekoiztuta, Miguel Bardemek zuzendu du eta aktore multzoaren artean Jose Angel Egido eta Unax Ugalde daude. Bi zatitan emango da tvmovie-a: lehena ekainaren 5ean eta bigarrena ekainaren 10ean.
