noticia
21:00ean
'Eskola bizia, herri bizia' dokumentala, ostegunean ETB-1en
A.H.
EITB
Gipuzkoako eskola txikien gaineko ikus-entzunekoak, eskola hauek herriaren zimendu bat ere badirela nabarmentzen du, herri proiektu bat.
Eskola Txikien Festa sortu zeneko 25. urteurrena ospatu berri da eta ospakizunerako ekimen ezberdinen artean, Eskola bizia, herri bizia' dokumentala sortu da. Gipuzkoako Eskola Txikietako Guraso Elkarteen Koordinakundearen eskutik gauzatu da proiektua eta eskola txikiek herrietan zer garrantzia duten eta pedagogikoki dituzten ezaugarriak aztertuko ditu. Halaber, 25 urtetako ibilbidearen ostean, eskola txikien mugimenduak gaur dituen kezkak eta erronkak jaso nahi izan ditu Eskola bizia, herri biziak, eskola txiki bakoitzean zein Koordinakunde mailan gogoetak eragiteko asmoarekin.
Eskola, ikasgela barruan gertatzen den hori baino askoz ere gehiago dela nabarmentzen du dokumentalak. Eskola, herriaren zimendu bat ere badela, herri proiektu bat.
Ikus.entzunekoak Gipuzkoako eskola txikietako hainbat kideren testigantzak jasotzen ditu, ahots aniztasun handia bilduz: eskola txikietako gurasoak, irakasleak, ikasleak, eta udal ordezkariak mintzo dira beren esperientziaz, kezkez eta erronkez. Horrez gain, eskola txikietako ikasgela barruan lana zer nola egiten den ere ezagutzera emango du dokumentalak, eta ikastalde batek hiruhileko batean burututako zientziatako proiektuari ("Energia eta kotxeak" da proiektuaren izena), hasieratik bukaerarainoko jarraipena egingo zaio erreportajean zehar.
Izenburuarekin batera, 'Eskola bizia, herri bizia', dokumentalaren irudi nagusia hiru hankadun aulkia da, eskola txikien mugimenduak hiru zutabe nagusi dituela irudikatzeko: udalak (eta administrazioak), gurasoak eta irakasleak. Eskola baten orekari eusteko, hiru hankak beharrezkoak dira eta nork bere eginkizunean sendo aritu behar da herri proiektua aurrera ateratzeko. Horrela, dokumentalak Eskola Txikien eta herri eta auzo txikien etorkizuneko erronkei heldu nahi izan die eta Eskola Txikien zuzeneko eragileei hainbat mezu eta ideia luzatzen zaizkie, hausnarketarako leiho bat irekiz.
'Eskola bizia, Herri bizia' ostegun honetan emitituko da 21:00etik aurrera ETB-1en.
