EITB TALDEA
Koparen bila!
EITBk bere onena emango du Kopako finalaren emozioa zuzenean eskaintzeko, programazio bereziarekin
EITB Media
ETB1ek zuzenean eskainiko du Osasunak Real Madrilen aurka jokatuko duen partida, eta Euskadi Irratian eta Radio Euskadin ere jarraitu ahal izango da. 'Koparen bila' lelopean, EITBk programazio eskaintza berezia prestatu du maiatzaren 6ko finalera begira.
EITBk zuzenean eskainiko du datorren maiatzaren 6an Real Madrilek eta Osasunak Sevillan jokatuko duten Errege Kopako finala. ETB1en ikusi ahal izango dugu Osasuna taldearen norgehiagoka historikoa. Halaber, emanaldia Euskadi Irratian eta Radio Euskadin jarraitu ahal izango da.
Finalaren emozio guztia zuzenean eskaintzeko, EITBk programazio berezia prestatu du, Koparen bila lelopean. Halaber, EITB Mediako lantalde zabala joango da Sevillara, eta bertatik bertara emango dute Kopa finalaren azken orduaren berri telebistan, irratian eta webgunean.
Asteazken honetan (apirilak 26) egin da jarraipen informatibo berezi horren aurkezpena Iruñeko El Sadar futbol zelaian egin den ekitaldian. Osasunaren zelaian izan dira Joseba Urkiola EITB Mediako Kirol zuzendaria, eta Jon Balenziaga eta Diego Arambalza EITBko kirol kazetariak, besteak beste. EITBko kirol, albistegi eta saioetako lantaldeetako beste hainbat kide ere egon dira, baita Nafarroako kirol, kultura eta gizarte arloko zenbait aurpegi ezagun ere.
Joseba Urkiola
Aurkezpenean azaldu dutenez, maiatzaren 3tik aurrera EITBko programazioan Kopa finalaren inguruko eduki bereziak izango dira ikusgai. ETB1eko eta ETB2ko kiroletako albistegiak bertatik egingo dituzte maiatzaren 5ean eta 6an, set berezian; eta ETB2n "Nos Echamos a la Calle" berezia egingo da, zuzenean, partidaren aurretik. "Koparen Bila" saioa izango da ikusgai ETB1en; eta, nola ez, "Navarra Hoy" berezia izango da finalaren bezperan, ETB2ko Nafarroako deskonexioan.
Jon Balenziaga
Irratietan ere jarraipen berezia egingo diote astean zehar, eta saio bereziak eta konexioak izango dira finalaren bezperan eta egunean bertan, Sevillatik. eitb.eus-eko atal berezian jasoko da eduki hori guztia.
Diego Arambalza
Finalari begira, baliabide eta bitartekari guztiak jarriko ditu EITBk: 15 kazetaritik gora, plato berezia, erreportajeak, elkarrizketak eta gonbidatuak…
Koparen bila
Kirol lantalde zabala Sevillara
Euskal Telebistako kazetari lantalde zabala joango da Sevillara. Iñigo Lasa maiatzaren 3tik izango da bertan, eta ostegunetik aurrera Jon Balenziaga, Jose Ituarte, Jon Elortza eta Amane Ibañez egongo dira bertan "Gaur Egun" eta "Teleberri"rako zuzeneko konexioak egiten. Hurrengo egunetan, Iñaki Errea, Olatz Foruria eta Naxari Altuna gehituko zaizkie.
Telebistako kazetariei Euskadi Irratiko Iñaki Berastegi, Unai Urreaga eta Haritz Gallastegi, eta Radio Euskadiko Rafa Aguilera, César Pérez, Raúl Pando eta Diego Arambalza batuko zaizkie. Halaber, han izango dira eitb.eus-eko Andoni Beldarrain eta Alain Ibarra.
Zuzeneko saio bereziak Euskal Telebistan
ETB1en, Naxari Altunak egingo du finalaren kontakizuna Cartuja estadiotik zuzenean, Juanan Larrañagarekin eta Mikel Arruabarrenarekin. Berebat, partidaren aurretik eta ondoren saio bereziak izango dira ikusgai ETBn.
Maiatzaren 5ean Euskal Telebistako kiroletako albistegiak Sevillatik egingo dituzte, plato berezi batean, Jon Balenziagak ETB1en eta Jose Ituartek ETB2n aurkeztuta. Maiatzaren 6ko eguerdiko informatiboa ere set berezi horretatik egingo dute.
Larunbat arratsaldean, ETB2n, "Nos Echamos a la Calle" berezia egingo da, 19:00etatik 21:00etara. Ane Ibarzabalek eta Egoitz Txurrukak aurkeztuta, zuzeneko saio honek gonbidatu bereziak izango ditu, eta konexioak egingo dituzte Sevilla eta Iruñeko hainbat tokitatik, azken orduaren eta giroaren berri emateko.
Maiatzaren 6an bertan, partidaren aurretik, "Koparen Bila" saio berezia izango da ikusgai ETB1en, 21:10etik 22:00etara, zuzenean. Ana Ramosek finalaren atariko saioa gidatuko du Bilbotik, Sevillako Cartuja futbol-zelaian egongo diren Jon Balenziaga, Naxari Altuna, Amane Ibañez eta Iñigo Lasarekin zuzeneko konexioan.
Zuzeneko saioak jarraipena izango du norgehiagoka amaitzean, gertatutako guztia aztertzeko. Bertan, lehen erreakzioak, zuzeneko konexioak, elkarrizketak, zaleen hitzak eta prentsaurrekoetan esandakoak bilduko dituzte, besteak beste.
Jarraipen berezia irratietan
Euskadi Irratian eta Radio Euskadin ere tarte zabala hartuko du kopako finalak, eta aste osoan zehar hitzordu historiko honen inguruko edukiak landuko dituzte.
Maiatzaren 5ean, Sevillatik, azken orduaren eta giroaren berri emango dute Unai Urreagak, Iñaki Berastegik eta Haritz Gallastegik Euskadi Irratiko saio eta albistegietan. Hurrengo egunean, maiatzaren 6an, Euskadi Irratiak "Hiru Erregeen Mahaia" saio berezia eskainiko du 16:00etatik 20:00etara, Sevillatik; eta, besteak beste, Iruñetik ere zuzeneko konexioak egingo dituzte. Ondoren iritsiko da finalaren zuzeneko kontaketa, 21:00etatik 01:00etara, Jon Altunak zuzenduta, eta Haritz Gallastegiren kontakizunarekin. Nerea Zusberro, Txema Añibarro, Gari Uranga eta Angel Garitano izango ditu kontakizunean lagun.
Radio Euskadi ere buru-belarri arituko da finalarekin. Aste osoko edukiez gain, larunbatean jarraipen berezia egingo dute Sevillatik eta Iruñetik. Rafa Aguilera izango da Nafarroako taldearen berri emango duena, eta berak ere egingo du partidaren kontakizuna. Aguilerarekin batera, César Pérezek, Raúl Pandok eta Diego Arambalzak emango dute azken ordukoaren, protagonisten eta giroaren berri.
Larunbatean, 13:00etatik 14:00etara, saio berezia eskainiko dute Sevillatik, azken ordukoarekin, elkarrizketak eta finalaren gakoen analisiarekin. Ondoren, 18:00etatik aurrera, "Kirol Festa" eskainiko da, partidaren atariko ikusgarria. Ondoren iritsiko da kontakizuna, Cartujan gertatzen denari erreparatuz, Rafa Aguileraren eskutik eta e Luis Fernando Dadie, Mikel González eta Iñaki Alzolaren iruzkin teknikoekin. Behin finala amaitzean, partidaren ostekoari ekingo diote, 01:00ak arte, protagonisten ahotsak entzun eta finalaren analisia egiteko. Taldearen koordinazioa Asier Kareagaren esku egongo da, eta maila teknikoan Joseba Urruela.
Kopari eskainitako atal berezia eitb.eus-en
EITB Taldeko eduki berezi guztiak ikusgai eta entzungai egongo dira eitb.eus-en: argazkiak, audioak, bideoak… Gainera, kopa finalaren inguruko azken orduaren berri emango dute, eta kopako eduki guztiak bilduko dituen atal berezia prestatu dute: eitb.eus/kopa/
Bestalde, giroari eta partidari buruzko zuzeneko kontaketa egingo dute, eta gertatuko den guztiaren berri emango dute sare sozialetan.
Sare sozialetan #KoparenBila traolarekin zabaldutako eduki guztiak ikusi ahal izango dira horretarako garatuko den modulu berezi batean.
