Ekonomia -
Kaleratzeak
Zamudioko eta Iruñeako Gamesako langileek itxialdia egingo dute
Zuzendaritzak iragarri dituen "berehalako" 52 kaleratzeak salatzeko egingo dute itxialdia.
Erredakzioa
Gamesan CC.OO. sindikatuak dituen ordezkariek itxialdia hasiko dute gaueko hamarretan. Itxialdia Zamudioko eta Iruñeako egoitzetan egingo dute eta zuzendaritzak iragarritako 52 langileren "berehalako" kaleratzeak salatuko dituzte.
Ohar bidez adierazi dutenez, 52 kaleratzeak aste honetan bertan gauzatuko dira, ostegun eta ostirala artean. Konpainiaren egitura alorrari eragingo dio erabakiak. CC.OOren hitzetan, Zamudioko lantegiko hamar langile eta Iruñeako 25 kaleratuko dituzte. Gainerako kaleratzeak Espainiako beste lantegietan egingo dira.
Sindikatuak Gamesaren jarrera salatu du, urteko azken hiruhilekoan 31 milioi euroko onurak izango dituela iragarri eta gutxira hartu baitu 52 langile kaleratzeko erabakia.
Gamesak ia 700 langile kaleratu ditu 2012tik egindako bi enplegu-erregulaziotan.
