Urkullu: 'EAJk ez du Kutxabank saltzeko inolako asmorik'

Iñigo Urkullu lehendakariak ziurtatu duenez, ez dago Kutxabank “saltzeko inolako asmorik” eta “are gutxiago EAJren aldetik”.

Martin Garitano Gipuzkoako ahaldun nagusiak herritarrei “informazioa ezkutatzea” leporatu dio alderdi jeltzaleari; bere ustean, EAJk bazekien “pribatizazioaren alde” eginda Kutxabank “saldu” eta lurraldea “kontrol publiko eta sozialik ez duen finantza entitatea gabe” geratuko litzatekeela.

Mexiko D.F.n egindako prentsaurreko batean, Urkulluk ziurtatu egin du bere alderdiak ez duela hiru kutxen arteko bate egitearen ondoren sortutako Kutxabank fundazioa saldu nahi.

Garitanok, bestalde, “kezka” azaldu du, Kutxa eta Kutxabanken etorkizunaren inguruan,  eta, bere ustean, “ez da berandu” entitatea “ez galtzeko”, borondate politikoa baldin badago “banku fundazio izatetik ohiko fundazio izatera aldatu besterik ez dago”, eta  operazio hori “legezkoa eta bideragarria” da.

Garitanoren esanetan, Diputazio gipuzkoarrak esandakoa “baieztatzen ari da”, Xabier Iturbe Kutxako presidenteak eta EAJk ukatu eta gero.