Ekonomia -
2015eko Aurrekontuak
Gipuzkoako Aurrekontuak EAJrekin adostea 'posible' dela uste du Bilduk
Akordioa "gertu" dagoela aurreratu du Xabier Olano Ogasun zuzendariak.
Erredakzioa
Xabier Olano Gipuzkoako Aldundiko Ogasun zuzendariak 2015. Aurrekontuei buruz EAJrekin akordioa lortzea "posible" dela uste du. Are gehiago, akordioa "gertu" dagoela nabarmendu du.
Olanok EHUren Erizaintza Eskolaren harreran egin ditu adierazpenok, Euskararen Nazioarteko Egunaren harira ekitaldia egin baitute bertan.
Ogasun zuzendariak azaldu duenez, Aldundiak eta EAJk bilera egin zuten asteartean, eta akordiorik lortu ez bazuten ere, "aurrerapauso garrantzitsuak" eman zituzten.
Horren ildotik, bi aldeek sustapen ekonomikora funtsak bideratu behar direla uste dute. Foru Gobernuak 85 milioi euro aurreikusten ditu zeregin horretarako, baina EAJk 26 milioi euroko zuzenketak aurkeztu ditu.
"Zenbakiak zenbaki dira, badirudi ez dela arazo handirik egongo EAJk eskatutakoa adosteko", esan du Olanok.
"Ostiraleko bileran edo, gehienez, abenduaren 10erako, espero dugu akordioa lortzea", gaineratu du.
