% 10,9 hazi da bidaiarien kopurua apirilean EAEn

Euskal Autonomia Erkidegoko (EAE) hoteletan ostatu hartu zuten bidaiarien kopurua % 10,9 hazi zen apirilean, batez ere, Bizkaian izandako emaitzek bultzatuta. Bertan, % 16 hazi zen bidaiarien kopurua.

Eustat Euskal Estatistika Erakundeak argitaratutako datuen arabera, aurreko hilean 208.825 bidaiari erregistratu ziren EAEko hoteletan, aurreko urteko hilabete berean baino 20.521 gehiago. Lurraldez lurralde, bidaiari-sarrerak % 16 hazi ziren Bizkaian (99.647 bidaiari guztira), % 7,9 Gipuzkoan (81.944 bidaiari guztira) eta % 3 Araban (27.234 bidaiari guztira).

Bestalde, 2015eko apirilean 386.755 gaualdi erregistratu ziren, iazko apirilean baino % 8,2 gehiago. Gaualdiei dagokienez, Bizkaiak izan du igoerarik handiena (% 12,4), Gipuzkoaren (% 6,4) eta Arabaren (% -0,6) aurretik.

Bidaiarien jatorriari erreparatuz gero, Euskadi bisitatu duten turista espainiarren eta atzerritarren zenbatekoa hazi egin da; % 10,3 eta % 12, hurrenez hurren. Bizkaian eta Gipuzkoan turista espainiarren eta atzerritarren kopurua areagotu egin da eta Araban, berriz, atzerritarrak ugaritu egin dira eta espainiarrak, ostera, jaitsi (% 1).

Batez besteko egonaldia 1,85 egunekoa izan da, 2014ko apirileko batez bestekoa (1,90 egun) baino txikiagoa.

Bestalde, landa-ostatuei dagokienez, bidaiarien sarrerak % 1,4 hazi ziren apirilean, baina gaualdiak % 5,9 jaitsi ziren. Guztira, 10.957 bidaiari-sarrera erregistratu ziren eta 26.511 gaualdi.

Bidaiarien batez besteko egonaldia murriztu egin da; izan ere, 2,61 egunekoa izan zen iazko apirilean eta 2,42 egunekoa izan da 2015ekoan.