Ekonomia -
Eruopa
Hogeita Zortzien bilera bertan behera, negoziazioei bide emateko
Euroguneko Ekonomia eta Finantza ministroek gauerdian amaitutzat eman dute eztabaida luzea, Greziaren hirugarren erreskatearen gaineko negoziazioak zabaldu ala ez erabakitzeko.
Agentziak
Donald Tusk Europako Kontseiluaren presidenteak bertan behera utzi du Hogeita Zortzien Estatuburuek eta Gobernuburuek egitekoa zuten bilera, Greziaren gaineko negoziazioei "denbora gehiago" emateko.
"Gaurko goi bilera bertan behera utzi dut. Euroari buruzko goi bilera 16:00etan hasiko da eta Greziaren gaineko negoziazioak bukatu arte iraungo du", esan du Tuskek, Twitterren duen kontuaren bidez.
Ekonomia eta Finantza ministroek larunbatean bukatu behar izan zuten aztertzen Alexis Tsiprasen Gobernuak aurkeztutako proposamena eta horren trukean eskainitako neurriak eta erreformak.
Halere, bi ordezkaritzaren arteko desadostasunek, Atenasek neurri gehiago hartu behar ote dituen eztabaidan izan da, eta agintarien konfiantza ezak ekarri zuten Eurotaldeak bilera bukatzea, erabakirik hartu gabe.
Akordiorik gabe
Euroguneko Ekonomia eta Finantza ministroek akordiorik gabe amaitu dute bart Greziak eskatutako hirugarren erreskatearen inguruko bilera.
"Oraindik oso zaila da, baina lanak aurrera doaz", adierazi du Jeroen Dijsselbloem Eurotaldeko presidenteak. Greziak egindako proposamenaren inguruan ministroek sakon eztabaidatu dutela azpimarratu du.
"Sinesgarritasunaren eta konfiantzaren arazoa eztabaidatu da, baita horri lotutako finantza gaiak ere, baina ez dugu amaitu eta bihar jarraituko dugu", esan du Holandako ministroak.
