CELeko langileek 21 kaleratze eta 59 aurre-jubilazio onartu dituzte

CEL Taldeko langileek onartu egin dituzte Lucart talde italiarrak konpainia beregain hartzeko jarritako baldintzak; ondorioz, 21 langile kaleratuko dituzte, 59 aurre-jubilatuko dituzte, eta 145ek beharrean jarraituko dute, baina batez beste % 20ko soldata murrizketarekin, Europa Pressek sindikatuetako iturriak aipatuta jakitera eman duenez.

Konkurtsoaren administratzaileak akordiora iristeko jarri zuen epearen bezperan iritsi da langileen erabakia. Bihar sindikatuek administratzaileari eta Lucart taldeari horren berri emango diete, ituna sinatzeko helburuarekin.

"15 baja borondatezkoak izango dira, gutxieneko kalte-ordainarekin, eta beste bospasei gogoz kontra kaleratuko dituzte", azaldu dute aipatu iturriek. Gainera, bost urterako lan-poltsa irekiko dute, eta etorkizuneko balizko kontratazioak langile ohien poltsa horretatik egin beharko dituzte.

Ituna bost urterako izango litzateke, italiarrek epe horretarako konpromisoa hartu baitute. Gaur egun geldirik dagoen paper-fabrikak behin behineko lan erregulazio txostena ezarriko die geratuko diren langileei, pixkanaka itzul daitezen beharrera.