Etxegabetzeak -
Suizidioa Bilbon
Hildako bilbotarraren lankideek diote albo kalteen biktima dela
Mantentze-lanetako funtzionarioek manifestazioa egin dute gaur lankide batek, etxetik kaleratu aurretik bere buruaz beste egin zuela eta, "lanaldiaren luzapenaren lehenengo biktima" dela salatzeko.
Erredakzioa
Eusko Jaurlaritzako mantentze-lanetako funtzionarioek manifestazioa egin dute gaur atzo Bilbon bere buruaz beste egin zuen lankidearen egoera salatzeko, eta "Administrazioko langileen lanaldiaren luzapenaren ondoriozko albo kalteen lehenengo biktima" dela azpimarratu dute.
Ehundik gora euskal funtzionario elkartu dira gaur goizean Bilbon, Jaurlaritzaren egoitzaren parean, etxetik kaleratu aurretik bere buruaz beste egin zuen lankideari elkartasuna adierazteko.
ELA, LAB, CCOO eta UGT sindikatuek bat egin dute kontzentrazioarekin, eta Joseba Izaga LABen ordezkariak azaldu duenez, atzo hildako bilbotarra "9.000 behin behineko langileetako bat zen". Josu Erkoreka Jaurlaritzaren bozeramaileak "albo kalte"tzat jo zuen behin behineko langileen kontratuak ez luzatzea.
Administrazio publikoko langileen lanaldia luzatuko zutela iragarri ostean, Erkorekak "albo kalteak" aipatu zituen neurri horiek behin behineko eta bitarteko langileengan izango zuen eragina azaltzeko.
Izagak salatu duenez, "ordezko langileen lan-poltsaren benetako heriotza gertatu zen atzo, eta milaka euskal familia bizi dira lan-poltsa horiei esker".
Hori dela eta, funtzionarioek "atzera" egiteko eta langileen eta lan-baldintzen inguruan esaten duenarekin "kontuz" ibiltzeko deia egin diote Jaurlaritzari, "egunero ikusten baititugu neurri horien ondorioak".
