Gizartea -
Zabor-bilketa
Gutxienez %70 birziklatzea adostu dute Elgetan Udalak, EAJk eta Bilduk
Lehenengo herritarrekin adostuko dute nola lortu birziklatze-tasa hori, eta gero kontsulta egingo dute, abenduan. Txingudiko Mankomunitateak bosgarren edukiontziaren aldeko apustua egin du.
Erredakzioa
Gipuzkoan zaborra biltzeko sistemaren inguruko eztabaida bizi-bizi dagoen honetan, ahalik eta gehien birziklatzea helburu hartuta, bi ekimenen berri eman dute: Txingudiko Mankomunitateak bosgarren edukiontziaren alde egin du birziklatze-tasa handitzeko tresna gisa, eta Elgetan, berriz, hondakinen % 70 birziklatzeko era herritarrekin adostu eta gero galdeketa egingo dute.
Herritarrekin adostuko dute hondakinen %70-80 nola bildu. Ados jarritakoan egingo dute herri-galdeketa. Abendurako aurreikusten dute hori. Hala jasotzen du behintzat atzo onartutako plangintza bateratuak.
Aralar eta independenteez osatutako Udal Gobernua, Bildu eta EAJ ados jarri dira, beraz, eta sistema bera baino gehiago, garrantzitsuena helburua dela nabarmendu dute.
Txingudi
Txingudiko Mankomunitateak, aldiz, bosgarren edukiontziaren alde egingo du, hondakinak hobeki sailkatu eta birziklatze-tasa handitzeko tresna gisa.
Irunen eta Hondarribian hondakinen % 37 birziklatzen dute gaur egun eta % 50-60ko tasara iristea litzateke edukiontzi marroiaren helburua, Aitor Kerejeta Hondarribiko alkatearen arabera.