Osakidetzaren azalpenen 'zain' daudela esan du Osasun Ministerioak

Ana Mato Espainiako Gobernuko Osasun ministroak Eusko Jaurlaritzaren Osasun Sailaren "azalpenen zain" daudela adierazi du, Trebiñuko neskato bat Txagorritxuko Ospitalean (Gasteiz) hil eta gero.

Umearen gurasoen esanetan, Osakidetzak errefusatu egin zuen Trebiñura anbulantzia bat bidaltzea, eta Mirandara (Burgos) deitzeko eskatu zien.

Atzo, Jaurlaritzak ikerketa bat abiatu zuen, gertatutakoa argitzeko.

"Euskadiko Osasun Sailaren azalpenei itxaron beharko diegu; horien azalpenen zain gaude, horiek informatu behar gaituzte eta", adierazi du ministroak.

Matok azaldu duenez, "ez dago protokolorik" kasu hauetarako; izan ere, "espainiar guztiek dute osasun zerbitzua Espainia osoan jasotzeko eskubidea".