Gizartea -
Transplanteak
Euskadi, organo-emaile aktiboenak dituen erkidegoa
Estatuko Transplanteen Erakundeak euskal autonomia erkidegoa saritu du, 2000 urteaz geroztik milioi bat biztanleko 40 organo-emaile baino gehiago dituelako.
Erredakzioa
Euskadik Estatuko Transplanteen Erakundearen saria jaso du gaur Madrilen, organo-emaile aktiboenak dituen erkidegoa izateagatik; izan ere, 2000 urteaz geroztik, milioi bat biztanleko 40 organo-emaile baino gehiago ditu euskal autonomia erkidegoak.
Jon Darpon Osasun sailburuak jaso du golardoa, aipatu erakundea duela 25 urte sortu zela ospatzeko Madrilen egindako ekitaldian.
Darponek esan duenez, Euskadi “aitzindaria” eta “eredugarria” izan zen Estatuko Transplanteen Erakundearen ereduaren “diseinuan eta abiapuntuan”.
2000tik, organoak emateko 1.375 prozesu izan dira EAEn, eta, ondorioz, 3.095 transplante egin ahal izan dira.
Horrez gain, hildako pertsonen senideek haien organoak emateko baimena eman dute kasuen % 90ean.