Auto-ilara luzeak AP-8an Itziarren, bost ibilgailuk talka egin ostean

Lau autok eta kamioi batek istripua izan dute AP-8 autobidean, Itziarren, Bilboko noranzkoan eta 6 kilometro arteko auto-ilarak sortu dira goizeko lehen orduetan, Eusko Jaurlaritzako Segurtasun Sailak berri eman duenez.

Ezbeharra 08:35ean gertatu da Itziarko gasolindegiaren parean eta pertsona bat arin zauritu da. Istripuaren ondorioz, autobidea erabat itxita egon da, ordu erdiz, Bilborako noranzkoan.

09:00ak aldera, errail bat ireki dute, baina auto pilaketa handiak sortu dira. Esaterako, goizeko hamarretan 6 kilometroko auto-ilarak zeuden.

Hainbat garabi eta langile lanean aritu dira bost ibilgailuak errepidetik erretiratzeko. 11:00etarako autobidea erabat ireki dute eta auto-ilarak amaitu dira.