Sexu-harremanen bidez kutsatzen dira Hiesaren kasu berrien 10etik 9

Sexu-harremanen bidez izaten dira Hiesaren kasu berrien % 90, Daniel Zulaika Hiesaren eta Sexu bidez Transmititutako Infekzioen XVII. Kongresu Nazionaleko presidenteak azaldu duenez. Gaur hasi eta ostirala arte Kongresua egiten ari dira Donostiako Kursaalen, Espainiako Hiesaren Diziplina arteko Elkarteak (SEISIDA) antolatuta.

Zulaikak Felix Lopez Salamankako Unibertsitateko Sexu Psikologiako katedradunarekin batera eman duen prentsaurreko batean azaldu duenez, 2013an 3.278 Hies kasu berri atzeman zituzten Espainiako Estatuan, eta guztira "150.000 pertsona inguru daude birusarekin kutsatuta".

Adituak azaldu duenez, "Hiesari aurre egiteko estrategiek aintzat hartu behar dituzte sexu bidez transmititzen diren gainerako gaixotasunak", eta gaineratu du "Hiesari aurre egiteko prebentzio neurriek balio dutela sifilis edo gonococia bezalako gaixotasun horiek saihesteko".

Bestalde, gogor kritikatu du kontsumo gizartea, "sexualitatea instrumentalizatu eta manipulatu" egiten duelako, “hezkuntza eta osasun alorreko eragileak isilik dauden bitartean". Lopezen arabera, horrek "kontraesana" sortzen du gizartean; alde batetik, "sexu jarduera sustatzen" duelako, baina "bestetik, nerabeek eta gazteek sexu jarduerak ezkutuan edukitzera behartzen dituztelako".

Haren esanetan, horrek "harreman zuzena du sexu bidez kutsatzen diren gaixotasunekin eta Hiesarekin, nerabeen ohiko jarrera baita arriskuaren kontzientzia gutxiago edukitzea eta jarduera arriskutsuetara jotzea".